جوزي كان يشوفني وانا بصلي بقلم اماني سيد

وبتقول أنا معيش أتعاب يا أستاذ، بس عايزة أخلص، قام وقف وبصلها باحترام وقالها يا مدام شرين، حقك وحق بنتك عندي، وأتعابي هي إنك تخرجي من المحكمة وانتي رافعة راسك.. أنا مش هاخد منك مليم واحد، وقضية الخلع دي هخلصها ليكي في أسرع وقت عشان الراجل ده لازم يعرف إن فيه قانون في البلد دي بيحمي الغلبان من الجبار.
المحامي عصام مكنش مجرد قانوني، ده كان فاهم إن القضية دي قضية حق قبل ما تكون قضية خلع. أول ما مسك الملف، بصل شرين وقالها بلهجة واثقة يا مدام شرين، إحنا مش بس هنطلقك، إحنا هناخد حق البنت اللي اتظلمت دي بالقانون، والراجل ده لازم يتربى عشان يعرف إن جسم الأطفال مش مباح
طلب منها فوراً تاخد بنتها وتروح الطب الشرعي عشان يتم توقيع الكشف الطبي عليها. شرين كانت خايفة ومترددة، بس كلام المحامي قواها. وهناك، الدكتورة شافت العجب؛ آثار الحزام كانت لسه معلمة زرق وخضر في جسم البنت النحيل، وآثار قديمة بتأكد إن التعدي ده كان منهجي ومستمر مش مجرد غلطة مرة واحدة.
التقرير طلع قنبلة في وش الزوج؛ أثبت وجود إصابات قطعية وكدمات ناتجة عن جسم صلب الحزام، وحدد تاريخها اللي انطبق تماماً مع يوم خناقة بنت ميادة. المحامي عصام مكدبش خبر، ورفع جنحة ضرب وتعذيب طفلة ضد الزوج، بجانب قضية الخلع.
يوم المحكمة، الزوج حضر وهو نافش ريشه وفاكر إن الموضوع كلمتين وهيخلصوا، وميادة كانت واقفة بعيد بتراقب ببرود. لكن المحامي عصام وقف قدام القاضي وفتح التقرير الطبي، وعرض صور الإصابات اللي تخلي الحجر ينطق. وصوته رج في القاعة سيادة القاضي، هذا المتهم لم ينتهك فقط حرمة بيته، بل انتهك طفولة بريئة، وحول الحزام الذي يستر عورته إلى أداة لتمزيق جسد ابنته إرضاءً لغريبة!.
القاضي بص للتقرير وبعدين بص للزوج اللي بدأ يترعش ولسانه يتقل، وصدر الحكم اللي برد نار شرين حكمت المحكمة حضورياً بحبس المتهم سنة مع الشغل والنفاذ، بتهمة التعدي بالضرب المبرح على طفلة قاصر.
الظباط قربوا منه والكلبشات لمعت في إيده وسط ذهول ميادة اللي جرت واستخبت من الفضيحة، والزوج كان بيبص لشرين بذهول وهو بيتحب من قدامها لزنزانة الترحيلات. شرين في اللحظة دي حست إن الحمل انزاح عن كتافها، وبنتها ضمتها بقوة وهي حاسة بالأمان لأول مرة. المحامي عصام بصلها بابتسامة وقالها دلوقتي تقدري تصلي وانتي مطمنة يا مدام شرين.. اللي كان بيشدك من شعرك، القانون شد إيده وراه القضبان.
المحامي عصام مسبش شرين إلا وهي واخدة حقها تالت ومتلت. استمر في ملاحقة الزوج في المحاكم، وبفضل التقارير الطبية وشهادة الجيران اللي شافوا البزخ على ميادة مقابل الجوع في بيت شرين، صدر الحكم التاريخي بالخلع مع تمكينها من شقة الزوجية وحصولها على كافة مستحقاتها ونفقة محترمة لبنتها ولابنها اللي شافوا الويل.
يوم النطق بالحكم، شرين خرجت من المحكمة وهي حاسة إن الهوا له طعم تاني، والقيود اللي كانت مربوطة حوالين رقبتها اتفكت. بس التحدي الأكبر كان إزاي هتبدأ حياتها وتصرف على ولادها بعيد عن قرش السباك اللي كان بيذلها بيه.
المحامي عصام، اللي اتعاطف مع قصتها من أول لحظة، م اكتفاش بالجانب القانوني وبس، وبدأ يدور لها على فرصة تضمن لها حياة كريمة. وفي يوم كلمها وقالها يا مدام شرين، فيه دكتور زميلي فاتح عيادة كبيرة ومحتاج حد أمين ومنظم يدير الحسابات والمواعيد، وأنا رشحتك وانتي قدها.
شرين راحت الشغل الجديد وهي شايلة سجادة صلاتها في شنطتها، مفيش حد دلوقتي هيمنعها تسجد لربها اللي نصرها. بدأت تشتغل في العيادة بجد ونشاط، والناس حبتها جداً لأمانتها وطيبتها. أول مرتب قبضته، راحت جابت بيه الكوتشي اللي ابنها كان نفسه فيه، واللبس الجديد اللي بنتها كانت بتتمناه وهي شايفة بنت ميادة بتلبسه.
الحياة بدأت تضحك لشرين من تاني؛ ولادها رجعت لهم الضحكة، وهي بقت ست عاملة ومستقلة، وكل ليلة قبل ما تنام بتبص لولادهم وهم نايمين في أمان وتهمس يا رب، أنت اللي قولت وعزتي وجلالي لأنصرنك ولو بعد حين.
الخبر انتشر في المنطقة زي النار في الهشيم، والكل عرف إن السباك دخل السجن بقرار محكمة عشان اللي عمله في بنته ومراته. لكن المحامي عصام، اللي كان شايف إن سنة سجن مش كفاية عشان تمحي كسر قلب شرين وآثار الحزام على جسم البنت، قرر إن الحساب لازم يكون من نفس الكأس اللي سقى منه أهل بيته.
عن طريق معارفه وقوة علاقاته، وصلت التوصية ل المسيرين جوه العنبر اللي نزل فيه الزوج. المحامي مكنش عايز يموته، كان عايز يذوقه بس طعم القهر اللي كان بيفرضه على شرين وهي ساجدة. أول ليلة ليه جوه، لقى نفسه في ركن ضيق، والنور خافت زي نور شقته اللي كان بيظلمها على ولاده.
فجأة، لقى الحزام اللي كان بيفتخر بيه، بيتم سحبه من وسطه بنفس الطريقة اللي سحب بيها بنته، وانهالت عليه ضربات خلت جسمه يصرخ بالوجع اللي كان بيوزعه ببرود. وكل ما كان يحاول يستنجد أو يصرخ، كان بيسمع نفس الجملة اللي كان بيقولها لشرين إنت لسه شوفت حاجة؟ ده إنت لسه هتدعي وما حدش هيسمعك.
الراجل اللي كان فرعون في بيته وبيمنع مراته من الصلاة، بقى جوه الزنزانة هو اللي بيتمنى اللحظة اللي يسجد فيها ويطلب الرحمة، بس الفرق إن المرة دي مفيش شرين طيبة تسامح، فيه عدل ربنا اللي اتسلط عليه في أضيق مكان. بقى بيمشي في السجن وراسه في الأرض، مكسور ومنبوذ حتى من المجرمين اللي زيه، بعد ما عرفوا إنه كان بيستقوى على طفلة وسجادة صلاة.
وفي الوقت اللي هو كان بيتبهدل فيه جوه، كانت شرين في العيادة بتبدأ حياتها بكرامة، وولادها بدأوا ينسوا الخوف، والمحامي عصام كان بيراقب المشهد من بعيد بابتسامة هادية، وهو عارف إن القانون خد مجراه في الورق، و
العدل خد مجراه ورا القضبان.
تمت بقلم امانى سيد