أخت زوجي ضربت بنتي حكايات الهواري

موجودة.
زينة سكتت لحظة.. وبعدين قالت بهدوء مرعب تمام.. الليلة دي هتخلص بطريقة عمرهم ما هينسوها.
طلعت كريمان ملف أزرق من شنطتها الصغيرة اللي كانت في العربية، وفتحته قدام زينة.
عقود.. أوراق ملكية.. إيصالات تحويلات.. وعقد الشقة.
زينة صفرت يا نهار أبيض.. دي الشقة باسمك إنتِ بالكامل!
كريمان ضحكت ضحكة كلها وجع مش بس الشقة.. العربية، والأوضة الجديدة اللي اتعملت لرشا، وحتى المطبخ الإيطالي اللي حماتي بتتباهى بيه قدام الناس.. كله من حسابي.
ومروان؟
كان بيقولي إحنا جواز يعني كله واحد.
ليان فتحت عينيها بنعاس وقالت هنروح فين يا ماما؟
كريمان باست راسها هنروح أي مكان فيه أمان يا حبيبتي.
طلعت فوق الشقة ومعاها الرجالة.
البواب حاول يقول يا مدام الناس فوق عندهم عزومة..
ردت وهي بتضغط على زر الأسانسير العزومة خلصت.
باب الشقة اتفتح على صوت الضحك والملاعق والكنافة اللي كانت لسه بتتقطع.
أول واحد شافها كان مروان.. قام مخضوض إنتِ رجعتي؟
دخلت بهدوء والرجالة وراها.
حماتي قامت واقفة إيه قلة الأدب دي؟ مين الناس دي؟!
كريمان مدت لها العقد الناس دي جاية تنقل عفشي من شقتي.
الصالة سكتت بالكامل.
رشا قامت تضحك بسخرية شقتك؟! إنتِ اتجننتي؟
كريمان رمت نسخة العقد على السفرة فوق طبق الورق العنب اقري يا حبيبتي.. الشقة دي باسمي أنا من أول يوم.
مروان خطف العقد بعصبية، وعينيه كانت بتتحرك بسرعة على الورق.
وشه اصفر بالتدريج.
حماتي قربت منه قولها تسكت.. دي بتهزر صح؟
بس مروان ما ردش.
لأن الحقيقة كانت مكتوبة قدامه بالتوقيع والختم.
كريمان قالت وهي باصة له فاكر لما قولتلي نسجل الشقة باسمي مؤقتاً عشان الضرايب؟ فاكر لما قولتلي إنتِ مراتي ومفيش بينا حساب؟
رشا صرخت يعني إيه تنقلوا العفش؟! إحنا قاعدين هنا!
كنتوا قاعدين في بيتي.. دلوقتي قوموا.
حماتي شهقت إنتِ قليلة أصل!
كريمان ضحكت الأصل؟ الأصل إن محدش يمد إيده على طفلة صغيرة.
الرجالة بدأوا يفكوا النجف.
صوت المفكات خلا رشا تجري ناحية الأوضة إنتوا
بتعملوا إيه؟! ده النجف الإيطالي!
أحد الرجالة رد ببرود المدام قالت يتنقل.
حماتي بدأت تصوت يا ناس! الحقونا! دي بتسرقنا!
كريمان لفت لها ببطء أسرقكوا؟ يعني أسرق حاجتي؟
مروان قرب منها لأول مرة وقال بصوت واطي كريمان.. الناس بتتفرج.. عيب.
ضحكت في وشه لما بنتك اتمدت عليها إيد قدام الناس مكنش عيب؟
سكت.
كعادته.
واحد من الرجالة خرج شايل شاشة التلفزيون العملاقة.
رشا جريت تمنعه نزّلها!
الراجل بص لكريمان.
كريمان قالت كمّل.
في أقل من ساعة.. الصالة الفخمة اللي كانوا بيتباهوا بيها بقت شبه الخرابة.
السجاد اتشال.. النيش الفخم اتملى كراتين.. حتى غرفة السفرة اللي حماتي كانت بتقول إنها مستوردة مخصوص من إيطاليا اتفكت قطعة قطعة.
الجيران بدأوا يفتحوا الأبواب.
الهمسات ابتدت تملى الدور إيه اللي بيحصل؟ مراته بتطرده! بيقولوا الشقة باسمها!
حماتي كانت هتموت من الغيظ.
وقفت قدام كريمان وقالت إنتِ ناوية تفضحينا؟!
ردت بهدوء الفضيحة مش إني أخد حقي.. الفضيحة إنكم فاكرين إن الناس اللي بتسكت ضعيفة.
مروان شدها من دراعها إنتِ بتخربي بيتك بإيدك.
كريمان بعدت إيده البيت اللي مفيهوش أمان لبنتي مش بيت.
ليان كانت واقفة عند باب الأوضة ماسكة اللعبة الصغيرة بتاعتها، وعينيها بتلف على الناس وهي خايفة.
كريمان ركعت قدامها خايفة؟
هزت راسها.
متخافيش.. محدش هيزعق لك تاني.
ليان حضنت
رقبتها وهمست إنتِ قوية أوي يا ماما.
الجملة دخلت قلبها زي السكينة.
لأنها قضت سنين فاكرة إن القوة يعني تسكت وتستحمل وتحافظ على البيت مهما انكسرت جواها.
لكن بنتها الصغيرة علمتها إن القوة الحقيقية إنك تمنع الأذى قبل ما يكبر.
الرجالة خلصوا نقل آخر حاجة قبل الفجر.
الشقة بقت فاضية تقريباً.
حماتي كانت قاعدة على كرسي واحد في النص، وشعرها منكوش من الصدمة.
رشا بتعيط وبتشتم.
أما مروان.. فكان واقف في البلكونة ساكت.
كريمان قربت منه للمرة الأخيرة.
قال من غير ما يبصلها إنتِ كده دمرتي كل حاجة.
قالت لا.. أنا بس بطلت أسمحلكم تدمروني.
هنروح فين دلوقتي؟
ضحكت بمرارة اسأل أمك وأختك اللي كانوا فاكرين إن الدنيا ملكهم.
بص لها أخيراً وقال إنتِ عمرك ما كنتِ كده.
عشان عمري ما أخدت فرصة أبقى نفسي.
وسابته.
نزلت تحت مع بنتها وزينة.
عربيات النقل اتحركت مع أول أذان فجر.
والهوا البارد دخل صدرها لأول مرة من سنين كأنه نفس جديد.
زينة سألتها هتعملي إيه دلوقتي؟
كريمان بصت لقدام وقالت هبدأ من أول وجديد.
بعد أسبوع..
كانت كريمان مأجرة شقة صغيرة مفروشة في المعادي.
مش أفخم حاجة.. بس هادية.
مفيهاش صوت إهانات. ولا خوف. ولا حد يضرب بنتها عشان قطعة جلد محروق من الديك الرومي.
ليان رجعت تضحك تاني.
ترسم. وتجري. وتنام من غير ما تصحى مفزوعة.
أما مروان.. فبدأ يفوق متأخر.
عرف إن
أمه وأخته ما كانوش بس بيكرهوا كريمان.. كانوا مستغلينه هو كمان.
الحسابات اتقفلت. الكروت البنكية
وقفت. الشركة اللي كان فاكر نفسه شريك فيها اكتشف إنها باسم مراته.
ولأول مرة في حياته.. حس يعني إيه يبقى واقف لوحده.
فضل يرن عليها أيام.
رسائل.. مكالمات.. اعتذارات.
لكن كريمان كانت خلاص خرجت من السجن اللي اسمُه اللمة.
وفي يوم.. وهي راجعة من شغلها، لقت ليان واقفة في البلكونة الصغيرة مستنياها.
أول ما شافتها صرخت بفرحة ماما جت!
الجملة كانت بسيطة..
لكن كريمان حست وقتها إنها كسبت الدنيا كلها.
لأنها أخيراً بقت أم بتحمي بنتها.. مش ست مكسورة بتحاول ترضي ناس عمرهم ما عرفوا معنى الرحمة.
وفي ليلة العيد اللي بعدها..
كانت قاعدة هي وليان ياكلوا بيتزا على الأرض وسط كراتين لسه متفتحتش، ويضحكوا على فيلم كرتون قديم.
لا ديك رومي. لا نيش كريستال. لا ناس بتتكلم عن الإتيكيت والأصول وهي قلوبها مليانة سواد.
بس سلام.
ولأول مرة من سنين..
كريمان حست إن بيتها بقى بيت فعلاً.
بعد شهرين كاملين من ليلة العيد.. الليلة اللي اتقلبت فيها حياة كريمان وليان رأس على عقب.. كانت الشمس داخلة من شباك الشقة الصغيرة في المعادي بهدوء غريب، وريحة القهوة المالية المكان، وليان قاعدة على الأرض بتلوّن رسمة لعيلتها الجديدة.
هي.. ومامتها.. وقطة بيضا كانت بتجيلهم كل يوم للبلكونة لحد ما بقوا يحطلها أكل وسمّوها فلة.
كريمان خرجت من المطبخ وهي شايلة المج، وبصت للرسمة.
مافيش أب.
ولا تيتة.
ولا خالة رشا.
بس ضحكة ليان كانت واسعة لأول مرة من سنين.
قلب كريمان وجعها.. لأن البنت الصغيرة دي كانت محتاجة الأمان أكتر من احتياجها لأي حاجة تانية.
الموبايل رن.
الاسم اللي ظهر خلا وشها يتشد مروان.
سابته يرن. ويرن. ويرن.
لكن المرة دي الرسالة اللي وصلت بعدها خلتها تقف مكانها
بابا تعبان أوي.. وعايز يشوفك.
حماها.
الراجل الوحيد في البيت ده اللي عمره ما شتمها بشكل مباشر.. بس عمره برضه ما حماها.
الحياد
اللي بييجي وقت الظلم بيبقى خيانة بشكل أهدى.
زينة كانت قاعدة معاها وقتها، خطفت الموبايل وقرت الرسالة وقالت متروحيش.
كريمان سكتت.
زينة كملت وقت ما بنتك اتمدت عليها الإيد، الراجل ده كان بيقطع لحمة في طبقه عادي.
كريمان بصت لفنجان القهوة وقالت بهدوء عارفة.. بس يمكن عايزة أقفل الباب ده بنفسي.
في نفس الليلة.. راحت.
عمارة الزمالك نفسها كانت واقفة شامخة كأن حاجة ما حصلتش، لكن الحقيقة إن الدور كله كان عارف الفضيحة.
البواب أول ما شافها اتعدل في وقفته حمد لله على السلامة يا مدام.
لأول مرة يقولها مدام باحترام حقيقي.
طلعت الأسانسير وحدها.
ولما باب الشقة اتفتح.. الصدمة خبطتها في وشها.
الشقة شبه ميتة.
مافيش نجف. مافيش سفرة. مافيش ريحة أكل فاخر. حتى الصالون الكبير اختفى.
المكان كان فاضي بطريقة تفضح الحقيقة كل الهيبة اللي كانوا عايشين بيها كانت متعلقة بالحاجات اللي هي اشترتها.
حماتها كانت قاعدة