ليله الدخله عندينا يا همام لازمن تكون بلدي

هنتفضح عاد، غيري خلجاتك قبل ما افتح اخد الوكل من حماتك
اتكسفت منه ووشها ورد، وقامت للحمام لبست قميص نوم أبيض مطرز وعليه الروب، اول ما عينه جات عليها حسها أميرة زي بتوع الأفلام،فضل يبحلق فيها لحد ما خدت بالها وضحكت قالت
وبعدين يا ولد العم، هات الوكل يلا
قام فتح الباب زغردت أمه ووراها نسوان البيت دخلوا بصواني الوكل، وباركوا وخرجوا علطول .
خدها من ايدها وقعدها جمبه عشان تاكل، لكنها مقدرتش، كانت سخنة ومولعة نار، شكلها خدت برد من هروبها امبارح في عز المطر.
كانت بترتعش ومقدرتش تقوم من مكانها، خد من صنية الوكل طبق شوربة وفصص لها الفراخ، وقام سند راسها على دراعه، والايد التانية يأكلها الشورية، مكنتش راضية لكن بصة منه رعبتها خلتها تشرب من سكات
شاف لها حباية مسكن تنزل حرارتها، وفضل يعمل لها كمادات لحد ما الحرارة هدت ونامت، قعد يبص لها ملاك وديع غير كل اللي شافهم، أكل لقمتين من الكشك الصعيدي ، وطلع صنية الوكل لبره.
فضل الحال على كده عشر أيام، لحد ما قامت من تعبها، لقته بيلبس خلجاته وخارج للدوار بعد ما ندهوا عليه.
خرج طول اليوم، زهقت فلبست عباية من اللي حماتها سابتها لها، ونزلت تشوف إيه اللي بيحصل، لقت من فوق مجلس رجالة وهمام في صدر المجلس، وكل ما حد صوته يعلى بإشارة من يده أو نظرة من عينه، الكل يسكت ويوطي حسه
مكنتش مصدقة، ازاي همام اللي راعب الكل وبيتعمله ألف حساب، هو اللي كان قاعد يمرضها كل الأيام اللي فاتت، فضلت تتفرج عليه من بعيد، لحد ما بص بالصدفة لفوق شافها، اترعبت وجرت على أوضتها مخرجتش، لحد ما هو خلص مجلسه ورجع لها.
اطمن عليها وعرف انها بقت أحسن، قالها يلا يا لينا غيري خلجاتك عشان اوديك بيت أهلك
استغربت لينا قالت لهليه، أنا عملت إيه؟
قالها أنا تممت الفرح عشان مكسرش كلام جدي، لكن مش همام اللي يتجوز واحدة غصبن عنها، وكمان مش أي واحدة، بنت عمه اللي من لحمه ودمه.
بصت له لينا بإعجاب ودهشة هو ازاي متحضر كده، امال ايه اللي كان بيتقال عنه ده،والبنات اللي بيتجوزهم 
حس باللي في بالها فقال
في الصعيد عندينا اتعودوا عالحكاوي من أيام الربابة، وسيرة الهلالي،وأي كلمة بتتقال بتتعمل موال، فمش كل اللي تسمعيه صحيح، ومش كل الكلام يتقال
بصت في الأرض وفهمت قصده، بس بدل ما تلبس وتروح معاه عند أهلها، طلبت منه طلب تاني
قالت له أنا عاوزه اتعرف عليك، اديني فرصة اعرف همام اللي قدامي، مش اللي سمعت عنه
ضحك ضحكة بصوت عالي رجت المكان وقالها
اتفقنا يا بنت العم، ومن الفجر هنسافرو سوا لاسكندرية عند شقة أخويا بكري، سابهالنا هدية الفرح، ومش هعتبرك مرتي صحيح إلا لما إنتي اللي تطلبي ده يا لينا،ولو مش عاوزاني، هطلقك بس يفوت كام شهر عشان شكلك قدام البلد والصعيد كله
مر شهرين على لينا كانت أسعد واحدة كرم وطيبة وحنية وذوق، اتعلقت بهمام راجل شهم وكريم وغيور، اكتشفت فيه مزايا كتير متحلمش بيها والأكتر من كده انه مقربش منها حرفيا، لحد ما المهلة خلصت والشهور عدت، وجه يقولها اتفاقنا خلص وجه وقت ترجعي لأهلك
بس وقتها لينا اتعلقت في رقبته،وقالت له مينفعش تسيب مرتك تبات بره بيتك يا ولد العم
 وهو مقدرش يبعد عنها وكانت دي الدخلة الحقيقية مش زي ما النسوان طلبوا منه، لكن كانت دخلة حب وهنا وسعادة
تمت